Á Kreppimiðstøðini og í Ráðgevingini í Kvinnuhúsinum starvast dagliga leiðarin og tríggir ráðgevar/starvsfólk. Hesi hava námsfrøðiligar og sosialfakligar útbúgvingar, og hollar royndir at arbeiða við menniskjum í kreppu. Kvinnur kunnu venda sær til Kreppumiðstøðina alt samdøgrið. Hetta kann lata seg gera, tí umframt starvsfólkini eru 35 sjálvbodnar kvinnur við í eini vaktarskipan. Hesar hava vakt frá kl. 17 gerandisdagar til næsta morgun, og alt vikuskiftið.

Ráðgevingin hevur opið gerandisdagar frá kl. 9 – 16. Hetta tíðspunkt er møguligt hjá harðskapsraktum í parlagi og nærsambondum at ringja, og fáa vegleiðing/ráðgeving yvir telefon ella at fáa eina tíð til persónliga viðtalu. Eisini er møguligt at senda teldupost ella boð við FB og Instagram.

Eftir kl. 16 eru hurðarnar læstar, men telefonin svarar alt samdøgrið.

Arbeiðið í Kvinnuhúsinum er grundað á hjálp til sjálvhjálp.